Naim Tërnava rizgjidhet Myfti i Kosovës

Trupi Zgjedhor i BI të Kosovës rizgjodhi edhe për një mandat pesëvjeçarë Mr. Naim Tërnavën për Myfti të Kosovës.

Trupi Zgjedhor i Bashkësisë Islame të Kosovës në mbledhjen e sotme rizgjodhi edhe për një mandat pesëvjeçarë Mr. Naim Tërnavën për Myfti të Kosovës. Po sot Kuvendi i BI të Kosovës në mbledhjen konstituive zgjodhi për kryetar të Kuvendit Dr. Xhabir Hamitin.

Myftiu Naim Tërnava nga Trupi Zgjedhor i Bashkësisë Islame të Kosovës që e përbëjnë 54 anëtarë (Trupin Zgjedhorë të BI të Kosovës e përbëjnë 27 anëtarët e Kuvendit të BI të Kosovës, 25 kryetarët e Këshillave vendor të BI, Dekani i FSI dhe drejtori i Medresesë) mori shumicën absolute të votave, 37 sosh kundrejt kundërkandidatit – Dekanit të Fakultetit të Studimeve Islame të Prishtinë, Dr. Rexhep Boja, që mori 17 vota.

Mbledhja e Trupit Zgjedhor të BI të Kosovës do të vazhdojë pas një jave kur solemnisht do të bëhet inaugurimi i Myftiu dhe anëtarëve të Kryesisë të cilët Myftiu do t'ia propozojë Trupit Zgjedhor për miratim.

Po sot u bë edhe konstituimi i Kuvendit të ri të Bashkësisë Islame të Kosovë për periudhën e ardhshme pesëvjeçare.

Pas verifikimit të mandateve të kuvendarëve të rinj u bë edhe zgjedhja e kryetarit dhe nënkryetarit të Kuvendit të Bashkësisë Islame të Kosovës.

Për kryetar të Kuvendit të BI t ë Kosovës u zgjodh delegati nga Fakulteti i Studimeve Islame të Prishtinës, Dr. Xhabir Hamiti, ndërsa për nënkryetar – delegati nga Medreseja e Mesme "Alaudin" e Prishtinës, Fadil Hasani, thuhet në komunikatën për opinion të lëshuar sot nga Shërbimi për informim pranë Kryesisë së Bashkësisë Islame të Kosovës.